Ła cieza de Sant'Alvise ła ze un edifisio łerigiozo de ła sità de Venesia, situà inte'l sestier de Canaregio, afasà inte'l canpo omònemo.
Storia Ła Cieza dedicada a San Łodovigo da Tołosa, a Venesia famozo conosùo cofà Sant'Alvize, ła ze stada fata costruir inte'l 1383 da ła zentildona Antonia Venier, insieme a el monastier zontà, inte'l ponto che ghe ze stà suzerìo da'l Santo che deso ghe ze aparìo in sonjo. In 'sto monastier se ga retirà ła stesa dona, seguìndo ła règoła agustìniana.
Descrisión Costruìa co sénplisi modułe gòteghe, a pianta bazełegal.
Ła fasada ła ze ben sénplise, se ghe noda sìe lesene un fià spòrzenti, cołegàe da archeti ogivałi che i segue tuto el coronamento.
El portal in piera de Istria, el ze arichìo da na statua cuatrosentesca de'l santo.
Statue, alteri e màlmari sìesenteschi i parecia łe parede.
A réndar ancora più beła sta Cieza ła prezensa de'l barco, el tìpego coro pènsiłe, soreto da do cołone fiłiformi e barbacàni gotici. Altro aparir un mondo beło łe gràde in fero batùo drìo a łe cuałe se scondéa łe mùneghe.
Soto, a sanca de'l barco, ghe ze oto tołete rafeguranti epizodi biblisi, atribuìe a Lazzaro Bastiani.
Łe òpare de mazor prestizo de ła cieza, łe ze tre dipinti de Giambattista Tiepolo reałizài infrà el 1737 e el 1470:Incoronazione di spine e Flagellazione su ła navada drita e Salita sul monte Calvario su na parede de'l presbiterio. Beło, posto danansi a 'st'ùltemo cuadro, anca el dipinto de Angelo Trevisan Orazione di Cristo.
Su'l setesentesco alter in maramo połicromo a ła parede sanca ze poste tre statue atribuìe a Giovanni Maria Morlaiter.
El canpaniel el ga mantenjùo el só aparir orizinàl gotico de'l XIII sècoło. El se prezenta in coto co un còspedo a pinja e co gułie so i cantoni.
El convento de łe mùneghe su ła banda drita el gera orizinalmente formà da do giostri de i cuałi deso ghe ne resta intato soło che uno, e da un portegà co cołone in stiłe gotico e archi a tuto sesto. In tenpi moderni el convento el ze stà ocupà da łe Figlie della Carità.
Sito web de ła parochia http://www.santalvise.venezia.it Ła festa de Sant'Alivse Ła Ceza de Sant'Alvise - Storia
Bibliografia Le chiese di Venezia, Marcello Brusegan; Ed. Newton Compton 2008
Altri progeti
Alvise Alvise