El termine Zipango (Zipangu, Cipangu o Cipango) el ze stà doparà par ła prima volta in asołuto inte El Milion de'l viajador e scritor veneto Marco Polo par indicar el Japon .
Descrision Secondo Marco Polo, l’izoła de Zipangu ła ze asè granda. I abitanti i ze de pełe ciara, łi ze siviłizài e de beła prezensa. I vènera i idołi e i ze independenti da cualsiasi nasion foresta. L’oro el se cata in abondansa, anca se el Paeze el ze sarà al marcà co i foresti. El pałaso real el ze grando ben, e'l coverto el ze de oro. Łe càmare łe ze revestide de oro groso do déi, cusì come łe fenestre, i muri, i sałoni e tuto. Su l’ìzoła se cata tante perle (rose, tonde e grande, co un vałor più alto de łe perle bianche) e tante piere presioze. Ła richesa de l’ìzoła ła ze enorme. Marco Polo, El Milion, p. 155.
Storia de ła paroła
Co sto termine el se riferiva al teritorio de'l Japon, dopo aver descoverto de ła so ezistensa a ła corte de Kublai Khan a Khanbaliq durante el so viajo verso l’Estremo Oriente fra el 1271 e el 1288. Fin a chel momento, nisun europeo el gaveva mai sentìo parlar de sta tera. Ła distansa, sia zeogràfega che culturałe, e anca ła difidensa de i japonezi verso i foresti (nte'l XIII secoło i japonezi i ga rezistìo a do invazion mongołe ) łe ga fato venjer fora storie favołoze. Par via de łe so richese fantàsteghe, Cipango ła zera na destinasion da sonjo par tanti navegadori e re europei medievałi. Cristoforo Cołonbo steso, co'l ze rivà inte'l Mar de i Caràibi, el credea de esar su un arsipèłago poco distante da Cipango e dal Catai e el ga identifegà l’ìzoła co Cibao, na rejon setentrionałe de ła atuałe Republega Dominicana, so l’ìzoła de Ispanioła.
Etimołozìa L'orìzene de ła paroła ła ze probabilmente łigà al termine cineze 日本國 ( pinyin Rìběnguó; pronunsià /ʐɻ̩.pən.kuo/ ) doparà in Cina fin da l'era de i Yuan par dezinjar el Japon, de cui Cipango ze na prova de trascrision fonèdega.
Note
Voze cołegàe
Japon
Nomi del Japon Storia de'l Japon
Altri progetti
Categoria:Linganbo a interprojeto a Wikiquote che el ghe xe ma no el ghe xe in Wikidata