El caxo acuxativo (lat. accusativus casus) el xe ła fórma de ła declinasion doparà par indicar el conpleménto ogeto o el moto a luogo come par exenpio in latin "hominem video" (védo l'omo) o anca "domum eo" (vo caxa).
L'acuxativo de ojeto L'acuxativo come segnałador de ojeto direto de un verbo tranxitivo l'è l'uxo piasè comun e pi studià.
In łéngue come l'itałian o l' ingléxe l'acuxativo el xe deventà precixo del nominativo: "Maria vede l'uomo (acu.)" vs. "l'uomo (nom.) vede Maria" , fora che inte i pronomi forti che i mantien de łe difarense come par exenpio l'itałian "Tu vedi me (acu.)" vs. "Io (nom.) vedo te" o l'ingléxe "You see me" vs. "I see you". In vèneto anca i pronomi forti, tuti, i ga na fórma soła par acuxativo e nominativo: "Eła ła varda eło (acu.)" vs. "Eło (nom.) el varda eła", mentre calche difarensa ła resta intrà serti ojeti clitici e i sojeti clitici (che no gh'è mìa in itałian): "Ła ło (acu.) varda" vs. "El (nom.) ła varda". In latin e greco antigo ghe xera na distinsion ciara intrà nominativo e acuxativo anca sui nomi: latin "Bonum hominem (acu.) video" vs. "Bonus homo (nom.) me videt". Anca in łéngue come el ruso, el neogreco e el tedésco moderno i nomi, i agetivi e i artìcołi i distingue oncora bastansa ben l'acuxativo dal nominativo. Tedésco "Ich see den (ac.) guten Mann" vs. "Der (nom.) gute Mann sieht mich" El spagnoło el ségna co na prepoxision (a) soło l'acuxativo de persóna: "yo veo a Juan" vs. "Yo veo un gato".
L'acuxativo de luogo L'uxo latin de l' acuxativo de łogo el se cata anca in łéngue moderne.
In ingléxe xe restà soło el nome home coi verbi de movimento: "I go home" (vo caxa) vs. "I am at home" (so' caxa). In vèneto l'acuxativo sensa prepoxision a ła łatina coi verbi de moviménto: "vo caxa" (lat. domum eo = it. vado a casa), "némo Mésa, vien toła, tórno scóła", co tuti i nomi de paéxe: "rivo Pàdova, rìvito Venesia" (arrivo a Padova, arrivi a Venezia?) , "ndémo Roma" (lat. Romam eamus = it. andiamo a Roma) e coi infinìi "vo magnar", "vien védar(e)" estendèndose parfin ai verbi de stato: "sto caxa" (it. resto a casa"), "i vive Belun" (vivono a Belluno). In tedésco vien doprà l'acuxativo de moto co prepoxision: "Ich gehe in den Garten" (vo in Giardin) mentre el stato in luogo el ga el dativo "Ich bin in dem Garten" (so' in Giardin).
Categoria:Caxi
tr:İsmin hâlleri#-i hâli (belirtme hâli)