El nome de Consejo dei Pregadi el se refarise łetaralmente al fato che i senadori venjiva orizinariamente pregà de fornir el pròpio consejo al Doze, mentre el nome Senato se inponeva inveçe soło inte el XIV sècoło col difonderse de ła cultura umanista.
Conpozision e funsion Menbri ełetivi e de derito El Senato zera presiedesto da ła Serenisima Signoria co a cao el Doze, mentre i łaori zera preparai e dirizesti dai Savi del Cołejo. Ghe zera po' i Pregadi: ansituto i sesanta senadori anuałi ełezesti dal Mazor Consejo; a staltri se ghe zontava drìoman altri senadori che costituiva ła cusìdita Zonta, o sia : istituìa inte ła segonda metà del Trezento e rinovada par decreto de ano in ano, ła devenjeva ordenaria e perpetua parte del Senato inte el 1506, col definitivo nùmaro de sesanta senadori de Zonta. A sti menbri ełetivi se sumava drìoman, de derìto, l'intièra Cuarantia, el Consejo dei Dieze e i Avogadori de Comùn. Dal 1305 i sentava par derìto in Senato, sensa fabizonjo decreto del Mazor Consejo anca i Procuradori de San Marco. I pregadi zera distinguìbiłi par el fato de indosar ła toga rosa, contraponesta a ła normałe toga negra dei altri patrisi.
Menbri ex ofisio Parteçipava ai łavori del Senato un gran nùmaro de majistradi e funsionari del Stato de volta in volta ciamai a tratar ex ofisio, o sia par neçesità de incargo, łe materie che łi rivardava : i comandanti miłitari, a partir da Capitan del Golfo, Capitan Zeneral da Mar e Capitan Zeneral de Teraferma; i anbasadori, i baili e i consołi in partensa o al ritorno dai pròpi incarghi; i podestà e governadori de łe sità e teritori sotometesti; i proveditori e i menbri de Majistradi e Deputasion. Da rimarcar tutavia come, par l'uzo de asomar difarenti incarghi a ła medezema persona, de frecuente tanti de sti funsionari i raprezentase al contenpo pì funsion desconpanje e i fuse al contenpo łori istesi dei senadori ełexesti.
Bibliografia L'Archivio di Stato di Venezia. Indice generale, storico, descrittivo ed analitico. Tomo I - Archivi dell'amministrazione centrale della Repubblica Veneta e archivi notarili, 1937.
Altri projeti
Categoria:Istitusion de ła Republica de Venesia