Иштван Семан

Иштван Семан, Szántay-Szémán István, *5. юла 1880, Абауйсанто, Мадярске кральовство — †22. децембра 1960, Мишколц, Мадярщина — грекокатолицкый священик, педагог, доктор теологии, писатель, генералный викарь.Szémán István. //Révai nagy lexikona, том 17, с. 483.Магочій П.Р., Поп І., с. 685.Magyar Katolikus Lexikon

Карьера Матуровав в Пряшовѣ. На Будапештской универзитѣ зыскав докторат з теологии. 20. септембра 1903 прияв рукоположѣня в духовенство з рук епископа Ивана Вальи. Служив в парохом в селѣ Руска Нова Вес, пак помочным священиком в Пряшовѣ. В року 1905 зачав учити Закон Божый на Пряшовской кральовской католицкой прогимназии. Од року 1907 — школный иншпектор епархии, а од року 1916 — старшый иншпектор.Pirigyi István. Од року 1911 — апостолскый радник, в рокы войны — фелдкурат.

По Трианонѣ одышов до Мадярщины, быв занятый поступно на Министерствѣ народностей и в Народном Музею, а од року 1922 на Министерствѣ Вѣры и Школства.

В року 1925 пензионовав з урядництва и одышов до новоствореного в Мишколцу Апостолского Екзархату, де его первый екзарх Антал Папп именовав го генералным викарьом и старшым школным иншпектором. В року 1927 зыскав титул папского прелата, а 28. октобра 1938 Антал Папп повысив го на архипресбитера, што во Восточной Католицкой Церкви е найвысша годность по епископови. По смерти Антала Паппа стояв на челѣ екзархата цѣлый рок покы не быв выменованый новый екзарх, Миклош Дудаш, а пак надале зоставав генералным викарьом. В року 1934 за свои заслугы зыскав од Министерства Внутра дозвол на двоите призвиско Сантаи-Семан, Szántay-Szémán, котре одводить ся до его родиска, а пише ся з -y, што е знаком аристократичного рода, хоть до такого не належав.

Творчость Проводив мадяризаторску политику. Автор роботы Каждоденный хлѣб (Mindennapi kenyér, 1910, 1930), учебникох про школы Пряшовской епархии, як Рутенска азбука и читанка (Rutén ABC és olvasókönyv, 1916) з церковнославянскыма текстами.Ковач Ф.: Семан Степан.

Выдав веце книг з русской литературы в перекладѣ по мадярскы, напримѣр: Innen-onnan. Orosz elbeszélések. Bp., 1908; Idegen tájon. Orosz elbeszélések. Győr, 1908; Tíz év. Elbeszélés. Ungvár, 1912, Az újabb orosz irodalom. Bp. 1926. Зобрав и приготовив ку выданю зберьку русинского и словацкого фолклора Шариша Sáros vármegye tót-rutén népköltészete, котра была вызнаменана в конкурзѣ пряшовского литературного сполку. Тота зберька зостала невыдана.

Найвеце писав на теологичны темы, о восточном обрядѣ, унии, истории Грекокатолицкой Церкви. В року 1934 основав и быв редактором научного и церковно-политичного часописа Восточна Церковь (A Keleti Egyház), котрого кажде число доднесь не утратило цѣнность историчного жерела свого часу.

Жерела и одказы Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935. Семан Степан. //Ковач Ф. и др. Краєзнавчий словник русинів-українців. Пряшівщина. СРУСР. Пряшів, 1999. с. 309. Магочій П.Р., Поп І. (уклад.) Енциклопедія історії та культури карпатських русинів. Вид-во В.Падяка. Ужгород, 2010. — 856 c.+ХХХІІ с. Magyar Katolikus Lexikon: Szántay-Szémán. Pirigyi István: Szántay-Szémán István, általános helynök (1880-1960). ФОТО. //GÖRÖGKATOLIKUS ÖRÖKSÉG KUTATÓCSOPORT.

Референции

Катеґорія:Русиньскы церьковны дїятелї Катеґорія:Мадярскы писателе Катеґорія:Русиньскы історіци Катеґорія:Русиньскы педаґоґы