Камбоджа (кгм. កម្ពុជា, [kam.pu.ciə]), офіціално Кралёвство Камбоджа (ព្រះរាជាណាចក្រកម្ពុជា) — є держава в Юговыходній Азії. Гранічіть з Таїландом на северозападї, Лаосом на северовыходї, Вєтнамом на выходї, тай Тайськым заливом на юго-западі.
Кгмерьска імперія ся зъєдинила в 802. годі и пак 600 годув доміновала в цілому реґіоні. Через неї в Юго-Восточну Азію прийшов гіндуїзм, а май пак будгізм. У самуй лиш столици імперії Анґкорі была збудована булш ги тысяча храмув, змежи котрых майпознатый є Анґкор Ват. Спад моци Кгмерської імперії ся почав у XV. стогудю. У 1863. годі Камбоджа ся приключила ид Франції як протекторат. Независимусть зась дустала в 1953. У 60-х годах країна ся стала плацдармом в сосіднюй Вєтнамскуй войні, што пак привело ид гражданськуй войні в самуй Камбоджи. Гражданську войну в 1975. годі уйграли комуністы, познаті як «черлені кгмеры». У наслідному ґеноціді загыбли 1,5-2 млн людий, авадь дас четвертина населеня країны. Режім черленых кгмерув впав у 1979. годі позад вєтнамської окупації. По пудписаню лагоды (1991) и дочаснуй місії ОЗН (1992-93) Камбоджа ся зась стала монархійов.
Населеня Камбоджі числит булш як 15 міліонув. Будгізм практікуют булш як 97%, подля конституції ся рахує за державну реліґію. Змежи меншин сут вєтнамці, китайці, чамы и дас 30 меншых старожительськых ґруп (тзв. «верьховинські кгмеры»). Монарх Камбоджі (ныні Нородом Сіганук) ся уберат довічно. Теперішній премєр-міністер Гун Сен є в своюй довжности уд 1985. года. Камбоджа ся держит за єдну з майбідных держав Азії, попри тому ся єї економіка скоро збулшат. Важну роль дотеперь має земледілство, розвивают ся індустрії текстіла, будованя тай турізма.
Катеґорія:Країны Катеґорія:Южновыходна Азія