Константин Грабарь (*15. августа 1877, Унгвар, Мадярске кралевство — †21. децембра 1938, Чертеж, Чехословакия) — политичный, сполоченскый и державный дѣятель Подкарпатской Руси, третий губернатор Подкарпатской Руси.
Биография Родив ся 15. августа 1877 в Унгварѣ в священничой фамилии. Отець му, Леонтин Грабарь, быв грекокатолицкый священник в селѣ Дубровка. Мати, Гелена Мондок, была дѣвка унгварского каноника Ивана Мондока. Школу и гимназию выходив в Унгварѣ. По гимназии (1895) быв епископом Юлием Фирцаком посланый до духовной семинарии в Естергом, де учив ся в роках 1895–1898.Поп, Іван; с. 149. Довершив богословске образованя в Унгварѣ. Рукоположеный в духовный стан в року 1901. Поповав в Лучках (1901–1908) и Дубровцѣ (1908–1921).
Политична карьера На политичну сцену выступив во фебруарѣ 1919, коли быв выбраный на посланця Сойму Руськой Крайны, створеной в децембрѣ 1918 автономной административно-территориалной части Мадярской Людовой Републикы. В марцу 1919, на первом и послѣдном засѣданю Сойма инициовав и добив ся принятя ултиматума до мадярской влады, з жаданьом до 8 дни вызначити официалны границѣ Руськой Крайны. В републицѣ став ся коммунистичный переворот, влада нич не одповѣла. Константин Грабарь став ся членом управы Центральной Руськой Народной Рады (ЦРНР), котра выголосила суглас з плебисцитом америцкых Русинох о прилучѣню Подкарпатской Руси ку Чехословакии (8. май 1919), и быв членом делегации, што еще того мѣсяця повезла до Прагы русинску декларацию. На основѣ декларации ЦРНР и Сен-Жерменского договора 10. септембра 1919 Подкарпатска Русь стала ся автономнов частьов Чехословакии.
Економична карьера Од року 1921 лишать священничу карьеру и занимать пост директора Подкарпатского банка (1921–1928), што мав филиалкы в Мукачовѣ, Хустѣ, Раховѣ и Пряшовѣ. Активный участник културного, господарского и политичного живота, член Кошицкой торговой и промысловой коморы, член дирекции Товаришства кооператорох. Од року 1923 член муниципалной управы Ужгорода, а од року 1928 — староста Ужгорода. В добѣ его староства Ужгород став ся з провинцийного городка административным центром европейского взора. Скорыма темпами выставили урядовый квартал Галагов, зачав роботу аеропорт,Літераті, Тетяна (2019) водовод и канализация, ужгородска електрарня. Резултаты той роботы служать ужгородянам и нынѣ.Ігнаці, Наталія
Губернаторство Од рока 1925 быв членом провладной Аграрной партии, котра го рекомендовала на пост губернатора. 15. фебруара 1935 президент Чехословакии назначив Константина Грабаря на пост губернатора Подкарпатской Руси, а 1. марца 1935 новоназначенный губернатор склав присягу.
В часѣ губернаторства Константина Грабаря в столици Подкарпатской Руси появила ся помпезна административна будова Крайского уряду подля проекта архитектора Франтишка Крупкы, звана в людовой бесѣдѣ Народна рада, транспортный мост, днесь несучый имя первого президента Чехословакии. Розвивало ся школство, книговыданя. Будовали ся обытны домы, школы, болницѣ, административны объекты и др.
Але политична обстановка не дозволила досягти главны задекларованы политичны цѣли. Мюнхенска зрада активизовала процессы роспаду републикы. На территорию края засылали диверзны группы сѣверны и южны сосѣды. 2. новембра 1938 Вѣденскым арбитражом Подкарпатска Русь была збавлена южной части, своей столицѣ Ужгорода и стратила еще два векшы городы, Мукачово и Берегово. Вшыткы уряды Подкарпатской Руси мали быти евакуованы и зачати переданя территории уже 5.10.1938 и закончити 10.10.1938.Pop Ivan. Malé dejiny Rusínov, с. 107.
9. октобра 1938 Константин Грабарь резигновав з функции про несуглас з централнов владов, а функции губернатора перебрав Министер про Подкарпатску Русь Иван Парканий. Неодовго, зармученый скрахованьом своих амбитных планох, Константин Грабарь одышов на правду Божу 21. децембра 1938 в селѣ Чертеж, в родинном маетку. Погреб одбыв ся 23.12.1938.
Интересны факты В гимназиалны рокы цимборив зоз старшыма од себе хлопцями, з котрыма грав в музичной бандѣ и мав прозывку «Грипчи», але котры любили дакус и похулиганити; по едном таком хулиганствѣ дознали ся их призвиска и были тяжко покараны, а самого «Грипчия» не нашли, бо его призвиско не знали. По приходѣ совѣтского войска родинный маеток Грабарьох быв конфишкованый, а сын губернатора Мирон-Владимир, дипломованый правник, коли пробовав через суд вернути маеток, быв арештованый и посланый до лагрох. Внукы губернатора, котры унаслѣдовали его силный характер, в року 1998 зачали судовый процес навернѣня маетку и наконець по роках го выграли.
Жерела и одказы Pop, Ivan. Malé dejiny Rusínov. Vydalo Združenie inteligencie Rusínov Slovenska. Bratislava, 2011. S. 107
Делеган, Михайло. Отець Константин Грабар – губернатор Подкарпатської Русі (укр.).
Референции
Катеґорія:Русиньскы політіци Катеґорія:Державны урядници Катеґорія:Посланцьове парламента