Блажов, Blažov — заникле русинске село в окресѣ Сабинов Пряшовского края Словакии. Блажов быв положеный о 10 км на запад од Липан на берегах Торисы.
История Село первый раз спомянуте в догодѣ з 19. марца 1317 котров ся давать задача Блажейови з Брезовици заложити село на нѣмецком правѣ, а удѣлять ся му дѣдична функция шолтыса. Закладателе села на 18 рокы были увольнены од дани.
Село споминать ся аж до року 1918 яко Balázsvágás , што значит Блажейова Поруба. По року 1918 мать официалну словацку назву Blažov. Блажов быв населеный людми восточного обряда, а службы ся служили в церковнославянском языку. 28. септембра 1853 высвятили нову муровану церкву Святого Духа, а в службѣ ся зучастнили епископ Осиф Гаганець и каноник Александер Духнович. Тота церква стала ся послѣднов будовов, котра пережила заник села и была збуряна около року 1987.
В року 1950 комунистична влада Чехословакии заказала Грекокатолицку Церковь, против чого ся валалчане бурили. Не хотѣли богаты газдове Блажова ани колективизацию, бо они купили свои поля и лѣсы за тяжко зароблены в Америцѣ пѣнязи. В року 1952 рѣшила комунистична влада зрядити на територии, де лежав и Блажов, военскый выцвѣкoвый простор Яворина, а так ся збавити од проблемох.Сайт заниклого села Блажов
Ликвидация села 30. мая 1952 з полициев было зачате выселѣня, котрому подлягли 212 родин. Але уж в року 1953 127 родин вернули ся до своих обысть, бо не были спокойны з новыма быванями и з финанчныма одшкодованями. До конця року ся помалы вернули ай далшы. В наступных двох роках влада еще раз ай з помочов войска выселила людей, а хыжы им збуряли, жебы не мали де вернути ся. Послѣдный обыватель быв выселеный 26. мая 1955. За одпор пятеро были засуджены, а одбыли в арештѣ од мѣсяця до рока.
Днешность
Каждый рок в августѣ блажовчане зберають ся в ареалѣ заниклого села и припоминають собѣ его трагичну историю.
По падѣ комунистичного режима часть бывшых обывательох села подля закона о рештитуции вернула собѣ свои землѣ, а року 2011 основали на тых землях Лѣсне и поземкове дружство Блажов зо сѣдлиском в Кежмарку.
Военскый обвод Яворина рѣшеньом словацкой влады з дня 1. децембра 2010Nariadenie vlády SR č. 455/2010 Z. z. SR z 1. decembra 2010 o zrušení Vojenského obvodu Javorina. Ministerstvo spravodlivosti SR, dátum vydania 2010-12-01. Одчитане 2016-01-09. быв ликвидованый з платностьов од 1. януара 2011.
Вызнамны особы Родаком з Блажова быв Гавриил Блажовскый (*1705—†1742), епископ Мукачовскый Грекокатолицкой Церкви (1738-1742). В Блажовѣ выростав од сѣмрочного вѣку у свого стрыя, тутешного фараря Деметра Петренка будучый епископ Василь Гопко.
Жерела и одказы Stránka bývalej obci Blažov
Референції
Катеґорія:Заниклы села Словеньска Катеґорія:Бывшы населены пункты