Церьков святого Василія Великого є тридїлна зрубова церьков св. Василія Великого в Крайнім Чорнім, была збудована кінцём 18. стороча. Зруб є з екстерьєру крытый шынґлём. Стрїха є тыж покрыта шынґлём з ручно скіпаных клёцьків шпильковых стромів. План церькви складженый з трёх штворцїв спорядкованых у єдній лінії, почінаючой з выходной стороны пресбітеріём, штворцовов навов і на западї кінчачім бабінцём. Шырка бабінця є ідентічна зо шырков навы. В святынї і в наві є зрубова сістема внутрїшнёго упорядкованя. Обидва просторы суть закінчены куполами в подобі зрїзаного іглана. Вежа над бабінцём є приближно тых самых розмірів як шырка пресбітерія. Охрана вежы є реалізована вертікалныма дочками з шпилькового дерева а не зо шынґля як в другых частях церькви. Тоты два просторы од себе оддїлены навов взаємно гармонізують і створюють оптічно єднотну сістему цалой будовы.
Двоступнёва штириуглова станова стрїха над навов на гребіню мать малу кужелёвиту стрїшку (не з цібулёвыма надставцями, як в Ладомировій, Гунківцях, Бодруджалї і Миролї), на котрій є кованый желїзный крест. Стрїха над пресбітеріём є управляна, вальбова укотвена на наву, на гребіню зо штворцовым надставцём закінченым кужелёвітов стрїшков з крестом.
Церьков своёв архітектуров належыть міджі візантьскы сакралны будовы, де є выконованый выходный обряд і церьковна літурґія. Інтерьєр церькви творить бароковый іконостас з поліхромованов рїзбов і з іконами, котры были зготовлены в 18. сторочу. В церькви ся находять тыж іконы зо старшой добы. Церьков є огороджена деревянов зрубовов огородов, на котрій є шынґлёва стрїшка. Вступ до обєкту церькви є через капуру з кужелёвов стрїшков покрытов шынґлём. Церьков была обновлена в роках 1947 аж 1948 а на початку 21. стороча.
Інтересне, же на зачатку села є іщі єдна деревяна церьков покрыта бляшанов крытинов.
Література Chrám sv. Bazila Veľkého : Krajné Čierno. Občianske združenie Naše pamiatky. Drevené gréckokatolícke chrámy na východnom Slovensku. Svidník a okolie. Prešov : PETRA n.o., 2007, s. 50-61: "KRAJNÉ ČIERNO, Gréckokatolícky chrám sv. Bazila Veľkého z roku 1730, NKP". Syrový, B.: Architektura, Oborové endyklopedie SNTL., SNTL, Praha 1973. Herout, Jaroslav: Slabikář návštěvníků památek,Naše vojsko, 1980. Baleka, Jan: Výtvarné umění malířství/sochřství/grafika. Výkladový slovník academia. Praha 1997. Dudáš M. a kol.: Drevené kostoly. Edícia Kultúrne Krásy Slovenska. Vyd. Dajama, Bratislava, 2007 Dejiny ruského umenia, Bratislava, Pallas 1977, str. 83.
Екстерны одказы Krajné Čierno, Gréckokatolícky drevený chrám svätého Bazila Veľkého, 1730, NKP
Василія Великого (Крайнє Чорне)