Новины суть періодічно выходячі публікації (періодікум), котры штодень (денник, часто окрем недїлї) або найменше штотыждень (тыжденник) приносять найновшы подїї зо вшыткых можных областей а што найшвыдше о них інформують што найшыршу публіку. Новины ся друкують у великім форматї на новиновім папірю і намісто вязаня ся складають. Звычайны новины мають свою характерістічну ґрафічну управу, їх обсяг ся дїлить на рубрікы і часто доповнює вкладаным тыжденным додатком. Важнов частёв новин є тыж реклама.