Dactylorhiza russowii er ei plante med omdiskutert gyldigheit i marihandslekta Dactylorhiza i orkidéfamilien (marihandfamilien) Orchidaceae. Ho veks ikkje i Noreg.

Systematikk Dactylorhiza russowii høyrer truleg til kongsmarihand-gruppa D. majalis. Heile gruppa er tetraploid og har truleg kome til ved hybridisering mellom dei to diploide plantene engmarihand (D. incarnata) og skogmarihand (D. maculata ssp. fuchsii), kopla med dobling av kromosomtalet.

D. russowii har vore registrert i alle landa i Baltikum. I Litauen er han no rekna til D. traunsteineri, som er eit synonym for lappmarihand. Ei kartlegging i Estland i 2005 konkluderte òg med at registrerte funn av D. russowii skulle reknast til D. traunsteineri. I Latvia, Estland, Polen og i Plants of the World Online er han likevel framleis rekna som ein eigen art.

Utbreiing I Estland (estisk namn Russowi sõrmkäpp) veks D. russowii spreidd over det meste av landet og har status som sårbar (VU). I Latvia (latvisk namn rusova dzegužpirkstīte) veks han spreidd og er temmeleg sjeldan, men står ikkje som truga på den latviske raudlista. I Litauen veks D. traunsteineri (litauisk namn siauralapė gegūnė) spreidd søraust og vest i landet og er rekna som sterkt truga (EN).

I Tyskland har arten (tysk namn Ostsee-Knabenkraut) ein einaste kjend veksestad nær byen Gützkow i Mecklenburg-Frampommern, og han er ikkje raudlistevurdert. I Polen er det noko uvisst om D. russowii (polsk namn kukułka Russowa) i det heile veks.

Hybridar I Estland er det registrert hybridar mellom Dactylorhiza russowii og grasmarihand (Dactylorhiza incarnata ssp. incarnata × russowii). Dette er då truleg den same som er registrert mellom lappmarihand og grasmarihand (Dactylorhiza incarnata ssp. incarnata × majalis ssp. lapponica eller Dactylorhiza ×claudiopolitana, alternativt Dactylorhiza ×weissenbachiana) og som finst fleire stader i Noreg og Sverige, og er registrert i Finland.

Referansar

Genetisk variasjon og taksonomi i gruppa blir handsama i:

Bakgrunnsstoff

Kategori:Orkidear i Estland Kategori:Orkidear i Latvia Kategori:Orkidear i Litauen Kategori:Orkidear i Tyskland Kategori:Orkidear i Polen Kategori:Marihandslekta