O Gran Garaje é un edificio modernista de 1915, situado no centro da cidade de Pontevedra.
Localización O edificio está situado na rúa Benito Corbal, no centro peonil e comercial da cidade, preto da praza da Ferrería de Pontevedra.
Historia O edificio foi construído en 1915 na antiga rúa Progreso, segundo un proxecto do arquitecto Maximiliano Limeses Artime. Construíuse nun soar onde había unhas antigas cocheiras, para que servise de parada aos coches de cabalos.
Na década de 1960, co auxe do automóbil na cidade, renovouse a súa fachada, construíuse a nova cuberta e o edificio pasou a chamarse Gran Garaje, servindo como aparcadoiro de pagamento con capacidade para 75 vehículos (de aí o seu nome). Na década de 1970 as zonas a cada lado da entrada principal do edificio utilizáronse como dúas pequenas tendas, unha de recordos e outra de xoguetes. Na década de 1980, anos de grande especulación inmobiliaria na cidade, salvouse da demolición para a construción dun edificio de varias plantas ao fracasar a súa venda, deixando á vista as medianeiras dos grandes edificios que o rodean.
En 2014 o aparcadoiro e mais as dúas pequenas tendas da entrada pecharon definitivamente. Tras unha renovación completa da fachada e o interior, o edificio inaugurouse o 5 de maio de 2017 como tenda de moda da cadea de roupa Mango.
Descrición O edificio ten unha fachada modernista e un interior amplo, espazoso e diáfano, debido á función orixinal para a que foi deseñado. Ten unha superficie de 900 metros cadrados.
Trátase dun edificio dunha soa planta cunha planta baixa. A fachada branca ten unha gran porta cadrada de madeira encaixada no centro e dúas portas alongadas de arco rebaixado a cada lado. O tellado, catalogado e protexido como elemento patrimonial, está formado por unha lanterna, unha celosía e un tellado a dúas augas que data de 1965.
A decoración modernista con motivos florais céntrase sobre as catro portas laterais. O friso superior está abundantemente decorado e a parte central da fachada, sobre a gran porta de entrada, está coroada por un frontón circular enmarcado entre dúas pequenas columnas, baixo o cal se atopa a inscrición en relevo Gran Garaje.
Galería
Notas
Véxase tamén
Outros artigos Rúa Benito Corbal Modernismo
Ligazóns externas Imaxes da renovación do Gran Garaje Grandes firmas de moda en edificios históricos
Categoría:Arquitectura civil en Pontevedra Categoría:Arquitectura modernista en Galicia