Ілець (, , ) — рака ў Расіі, якая ўпадае ў Куйбышаўскае вадасховішча; да яго стварэння была левым прытокам Волгі. Выток і вусце знаходзяцца ў Рэспубліцы Марый Эл. Рака таксама працякае па тэрыторыі Татарстана, дзе яе даўжыня складае 34 км.
Даўжыня ракі — 204 км, плошча басейна — 6471 км². Ілець упадае ў Куйбышаўскае вадасховішча прыкладна за 4 км на захад ад горада Волжска. Абсалютная вышыня вытоку складае каля 160 м, вусця — 53 м.
Вадазбор Ілеці ўяўляе сабой хвалістую раўніну, складзеную пераважна пясчанымі, радзей сугліністымі адкладамі. Каля 60% яго тэрыторыі пакрыта лесам. Рэчышча звілістае, пераважна неразгалінаванае; у сярэднім і ніжнім цячэнні на пойме сустракаюцца шматлікія азёры-старыцы. Жыўленне ракі змяшанае, з перавагай снегавога. Веснавое разводдзе пачынаецца звычайна ў канцы сакавіка — пачатку красавіка і працягваецца ў сярэднім каля 40 дзён. Ледастаў утвараецца ў пачатку лістапада і трымаецца 140—150 дзён, але ў месцах выхаду падземных вод рака можа не замярзаць усю зіму.
Найбуйнейшыя прытокі Ілеці на тэрыторыі Татарстана — Яранка, Ашыт, Пецялка і Шора. Рака мае рэкрэацыйнае значэнне і выкарыстоўваецца як зона адпачынку.
Катэгорыя:Рэкі Марый Эл Катэгорыя:Рэкі Татарстана Катэгорыя:Прытокі Волгі