A seu d'a Santisma Trinidat (en anglés Holy Trinity Cathedral) ye una seu anglicana situada en Parnell, un barrio residencial d'Auckland, Nueva Zelanda.
Historia O primer puesto de culto anglicano en Auckland estió l'antiga ilesia de Sant Pablo, a o fin de Princes Street, encara que os residents de Parnell yeran cansos de caminar bels 3 km entre praus ta ir enta a ilesia. A primera ilesia d'iste districto estió adedicada a Sant Bernabé apóstol. Rematada en 1849, yera situada amán d'a muga de Parnell. Ista chicota ilesia de Sant Bernabé prencipió a deixar-se d'usar poquet a poquet dimpués de que estase rematada l'antiga ilesia de Santa María en 1860, y mas tardi sería tresladada a Mount Eden, a on encara fa parti d'a suya parroquia. Con a construcción d'a ilesia orichinal de Santa María, o bispe Selwyn establió a parroquia de Santa María.
L'antiga ilesia de Santa María se situaba amán d'o puesto de l'actual seu, encara que a la fin remató estando prou chicota, mal ventilada y incomoda. O establimiento d'as diocesis de Nueva Zelanda y o rapedo creiximiento d'a población d'Auckland, facioron que s'amenistase una ilesia mas gran. L'antiga ilesia de Santa María fue espaldada y en 1886 prencipioron os treballos en os terrenos adchacents ta construyir una nueva Ilesia Seu de Santa María. Iste edificio neogotico fue disenyau por o important arquitecto neozelandés Benjamin Mountfort y rematau en 1897. L'edificio sirvió como seu y prencipal ilesia anglicana d'Auckland dica 1973 cuan o presbiterio d'a Seu d'a Santisma Trinidat, d'a que s'heba meso a primera piedra en 1957, prencipió a emplegar-se. En 1982, a ilesia de Santa María se tresladó a l'atro canto de Parnell Road a o suyo puesto actual chunto a la seu.
Vinclos externos Pachina oficial
Auckland Categoría:Ilesias de Nueva Zelanda adedicadas a la Santisma Trinidat Categoría:Ilesias d'Auckland